市面好多防蚊用品好似蚊怕水咁都有避蚊胺（DEET），但外國機構警告6個月以下BB唔可以使用含DEET嘅產品，而2歲以下幼兒每日只可以用一次DEET低於10%嘅產品，同時避免長期使用。上網睇3M嘅蚊膏DEET有成34%，要小心使用呀（3M蚊膏DEET34%兒童不宜，含量大多高於10% 部分未註冊）。
見到咁樣都即刻勁驚，所以我希望先試用一啲最天然嘅方法防蚊／驅蚊方法，或者起碼係較適合BB用嘅防蚊產品。雖然我未逐一試過，上網樣樣野都有人話work有人話唔work，但希望可以畀咁多位媽媽參考，搵到最適合自己BB嘅方法。另外，我會盡量引用番網站內容，方便大家去判斷啲防蚊用品係咪有效同無害。
一、設施類
- 防蚊網：
安裝響窗口去阻隔蚊蟲，聽人講話日本城有DIY防蚊網賣，我唸住自己買材料DIY。 - 蚊帳：
設置蚊帳係最環保及最安全嘅方法。
我本身用網床用唔到安響木床嘅蚊帳，所以淘左個網床專用嘅蚊帳。不過肚B有時半夜會扎醒，通常咁樣肚B第二日就會畀蚊咬。
二、天然食材類
- 獨子蒜：
用個袋放2粒（搣衣，唔整碎都得）響窗口，有媽媽話得，不過成間房會好大陣味。
我響街市買左一扎$9有好多粒，搣左衣我又唔覺得好大陣味，試過有一晚放響窗邊都係畀衰蚊"we run run"，唔work！
- 麻油：
網上流傳用麻油可以驅蚊，好似好多實證話work，不過我又搵到篇文章話實用性唔大。由於我主要想搵方法等肚B夜晚瞓覺唔會畀蚊針，似乎麻油都唔太適合（我驚惹蟻惹小強囉）。
來源：http://www.libertytimes.com.tw/2010/new/aug/10/today-health4.htm
- 香矛：
有媽媽話新鮮香矛冇用，亦有人介紹泰國香矛膏夠味好似work，不過我唔知佢講邊隻。（香茅防蚊？權威實測 貼片、手環效果差）
朋友送左支香矛油畀我，都幾大陣味，所以只係去郊外先同肚B搽，暫時都冇畀蚊咬到。
三、電器類
- 超聲波驅蚊器：
原理係模仿雄蚊翼部拍動頻率的聲音，驅趕吸血嘅雌蚊，不過消委會報告都話質疑驅蚊器嘅成效（電子驅蚊器功效成疑）。
肚B契媽送過隻「德x驅蟲大王Bxx Sxxxx」畀我，我試過就驅蚊驅小強都唔得！
- 滅蚊燈：
原理係用藍紫色嘅光吸引啲蚊，再用燈罩嘅高電壓網電死啲蚊，要夜晚先有用。上網睇，見有人話消委會測試過之後，有隻意大利牌子Moel 396滅蚊燈獲最高評分推介。不過亦有人話會引更多蚊，而且好光，似乎唔適合夜晚放響睡房。
- 殺他死液體滅蚊器：
Blog友一仔媽都介紹，上網睇好多媽媽都話work，不過我唔肯定佢液體嘅成份。有篇報導話電蚊液主要成分係除蟲菊酯（Pyrethroids），係一種從菊花提煉出黎嘅植物性殺蟲劑，毒性較低。新浪網有篇文章仲話對於BB，電蚊液比起蚊香更安全有效，不過使用時要保持空氣流通，而且唔可以長時間使用。
來源：http://www.lisahk.com/share/lisa/0361/health/20060404health0102/content.htm
四、裝備類
- Alfresco蚊膏／蚊水：
英國牌子，都有幾多媽媽話work同埋適合BB用，有好少嘅香味，仲可以搽面，不過較貴。
買左黎試用，好香，適合BB用仲可以搽面，所以夜晚瞓覺都可以搽，但要4個鐘補搽一次，所以瞓醒都係有蚊咬。
- 瑞士寶寶防蚊液：
都有好多媽媽推介話好，不過太油。
- 雙妹嘜花露水：
雖然話係天然成份，但睇啲大陸網站話有驅蚊作用嘅花露水都有驅蚊酯，雖然毒性好少，但唔適宜每日用，而且最好稀釋後使用（如何選購驅蚊花露水 安全、舒適最為重要）。有媽媽話可以稀釋後抹地，不過有啲人話陣味散左就冇用。如果唔係直接搽落BB度，我覺得都可以試下。
- Chicco防蚊液：
好似幾多媽媽話work而好香，佢有走珠裝同埋花露水，有人仲每星期用稀釋左嘅花露水噴床仔。似乎幾好，我唸緊買雙妹嘜定買Chicco黎試。
買左一支噴霧裝，味道OK唔攻鼻，試過夜晚房有蚊噴完開窗睇下啲蚊有冇飛走，不過都係冇。
- 寶寶金水：
睇資料話係純中草藥制品，可以滴10幾滴落水同BB沖涼，有啲人話work但好大陣中藥味，但有啲又話陣味過左就冇用。搵到有個大陸網站話測試過冇DEET同「驅蚊酯（伊默寧）」，但另一個大陸網又話佢有「驅蚊酯」，真係唔知信邊個先好？不過寶寶金水感覺好大陸野，我冇乜信心唔打算用。
來源：http://www.people.com.cn/BIG5/paper503/12425/1117547.html
來源：http://big5.china.com.cn/info/home/2009-09/09/content_18491753.htm
其他驅蚊用品：
其他參考資料：
