全泵媽：一日泵2次

肚B足一歲啦！由於已經到我終極目標，所以我響肚B一歲生日開始改一日泵2次。

之前由一日泵4次改泵3次，只係將日頭泵奶時間推遲（泵奶schedule約06:40、15:00、10:30），過程唔算痛苦，過左頭幾日特別谷之後穩定左可以一日泵到約750ml。今次由一日泵3次改泵2次，預12個鐘泵1次，但頭兩日真係忍唔到12個鐘，基本上到10個鐘開始少少痛，11個鐘已經谷到變形滴奶兼好痛，雖然有食定卵磷脂防塞，但都忍唔住要泵出黎先！

過左兩日開始適應左，可以等到12個鐘先泵都只係有少少痛。其實適應左之後係開始少左啲奶，起碼頭兩日我係谷到爆好輕鬆可以泵到700ml，但到今日已經係泵到榭同埋要泵耐啲先有670ml。肚B宜家一餐食7-8安，其實都夠分3餐食，不過如果奶量再跌我都唔介意補奶粉，最好就下晝唔洗食奶，我又唔洗泵奶咁同肚B出街都free好多啦

其實餵母乳最緊要餵得開心，之前睇過明報一篇文章《餵母乳或奶粉 不減媽媽愛》，我好認同架！所以希望奶媽們唔好畀自己咁大壓力，最緊要餵得開心，自己開心BB都會感覺到呢～