白汁三文魚飯

其實前排個電子燉盅壞左，老公已經乘機叫奶奶用電飯煲整飯仔畀肚B食。見奶奶整整下都係變番杰粥（總之撈埋餸就變一pet pet啦！），所以我尋晚返黎見到就同奶奶講肚B要食飯仔，但奶奶仲係話驚肚B個胃仔頂唔順。

          

雖然肚B仲係好少牙，大牙都係得4隻，但肚B食飯仔都識咬細先吞，我覺得冇問題喎！除左仲係餵粥，奶奶成日驚肚B唔夠飽，話佢宜家咁大個要食8安奶（8安粉沖埋即係9安啦！），有時會再畀多2安（暈）。平時中午餵粥，食完之後沖埋涼2點幾又畀8安奶肚B食先抱佢瞓覺，好顛呀！

       
咁啱今日老公要同奶奶去拜山，我決定自己整飯仔畀肚B食！由於我廚藝麻麻，所以上網搵下靈感，見到依篇「幼兒食譜」用牛奶煎三文魚當白汁，我就參考依個食譜，不過冇落鹽改為落兩粒笑牛牌芝士吊下味。