戒片成功

舊年夏天已經想同肚B戒片，不過當時肚B先開始講單字，又未識表達自己，所以試左一日就放棄左。前幾個月肚B成日屙硬屎，多左坐potty開大，又多左講「屙屎屎」，所以唸住再同肚B戒片。同老師講，原來班上只淨2、3個小朋友未戒片，都唸住要5月戒晒片，所以就由5月18號開始戒片。

             

其實，頭幾日幫肚B戒片真係好frustrated，因為肚B唔識講，學校同屋企都賴幾次，成日提佢去廁所又話唔要轉頭就賴左，仲唸唔通肚B仲未ready？不過，咁橋就係肚B生日果日突然講「媽咪，急屎屎」，我即刻捉佢坐potty，原來係屙殊殊，但係佢肯講我已經好開心呢！
           
到第二個星期，肚B開始瞓晏覺同夜晚瞓覺冇濕片，佛誕假期果日我同佢去食早餐佢又話「急屎屎」，因為冇準備所以叫佢忍住返屋企先屙，個路程大概10分鐘，點知肚B忍到冇濕片返屋企先屙，令我信心大增。

           
雖然肚B對住我地肯講，但響學校都係唔講，如果冇定時帶肚B去廁所，佢響學校都仲有賴濕（註：老師話暫時朝早戒片，瞓晏覺時著番片）。不過到戒片第五星期，老師同奶奶講肚B進步左好多，佢響學校有同老師講「急屎屎」，所以已經冇再賴濕返黎呢！

             

其實之前試過同肚B出街成日佢都冇濕片，所以響戒片第六星期，即係啱啱過去依個星期，我地開始同肚B出街唔著片，肚B可以主動講出黎，雖然到宜家大多時間都分唔到「急屎屎」定「急尿尿」，但都算成功戒左片呢！ ^_^
         
戒左片雖然慳左，但有時都覺得幾煩，因為每次同肚B出邊去廁所都要抹廁所周圍先畀肚B坐。有時夜晚瞓覺時唔想瞓，或者出街食飯覺得悶，成日想借尿遁講「急屎屎」，又唔知佢真定假，出街抹乾淨畀佢坐好就即刻落地，真係好嬲架！

         
不過算啦，話晒肚B咁叻叻戒左片，總結番今次經驗：

1. 聽人講響夏天開始，如果返緊學就同步戒片成效會更好，所以我都係咁做
2. 當小朋友ready戒片，就算好似肚B咁本身唔識講，好快都會識得表達，戒片都易啲
3. 我冇買戒片褲只係買普通底褲，聽講戒片褲只係賴濕時冇咁易整到地下濕晒
4. 初時賴濕我唔會即刻同佢換，等佢知道賴濕左唔舒服（不過肚B一賴濕就即刻想除，響學校都係=_=）
5. 一開始戒片要成日提住，初時大約半個鐘問一次，慢慢掌握到小朋友個去廁所時間就可以耐啲問一次
6. 成功坐potty屙到或者識表達時可以誇張啲讚下佢，等佢有成功感

         
肚B係用依款potty，裡面有個兜淨係洗果part，上面果塊可以拆出黎套響廁所畀小朋友坐
           

講番出街去廁所嘅經驗，之前朋友送左幾塊Potty Cover畀我，依款係可以包埋廁所前面，咁小朋友坐上去都唔怕整污穢對腳，如果大家對清潔有要求又捨得的話（mamaishop $42/6塊，我唔捨得 :P），可以試下呀 @@

         
其實本身我都淘左啲廁所墊紙，不過so far都未用過，因為有個媽咪教我抹乾淨之後用抹手紙放響廁板上面都得，咁出街又唔洗拎多樣野。為左咁，我仲特登響屋企練習過先出街去廁所，宜家屋企有時會同肚B去大人廁所佢識自己坐上廁板，有時佢急就會自己衝去坐Potty呢！