不過我終於就放完產假，下星期一開始返工啦，所以由星期二開始試一日泵4次並模擬返工泵奶時間（泵奶schedule：06:30、11:30、17:00、23:30）。第一日試泵4次，朝早起身預兩個樽泵35分鐘泵到330ml，返工時間果兩次就泵25分鐘都泵到240-260ml，而臨瞓果次就特別谷泵到爆樽約280ml，一日個量都仲keep到1100ml以上。
真正爆樽留影，其實泵到咁滿雪完之後好難倒啲奶出黎（因為面果浸脂肪「章」住）
由於我夜晚會特別谷，尋晚臨瞓果轉用兩個樽去泵，泵到350ml，一日4次加埋泵到1200ml。由於個奶量都算理想，我預計到返工時，公司泵果兩次可以泵20分鐘內或者泵到210-240ml就停，另外靠早晚泵夠330ml，我都仲keep到每日約1100ml奶量。如果細妹冇嘔奶要補奶畀佢的話，我仲可以每日畀到一餐奶畀肚B添！
雖然宜家泵少左1次奶，但有時候都覺得幾困身，尤其當想同肚B出去玩又玩得唔耐。好彩老公好支持我餵人奶，之前同肚B去學校旅行都試過響廁所泵奶而老公負責睇住肚B，約Blog友仔出黎玩佢地都唔介意我出黎泵1次奶。上胎我餵肚B餵到14個月就停，今胎我希望做到世衛建議餵到2歲，遲啲細妹夠1歲又食到2餐固體時，我可以淨係早晚泵奶就冇咁困身呢！
題外話，話說我宜家淨係用優合奶泵貪佢夠大力又靜，本身有兩部Medela Swing都唔唸住用。與其放出去，想睇下有冇想餵母乳嘅Blog友想要？我可以免費送出，希望鼓勵更多人餵母乳呢！
