肚B新床（碌架子母床）

我生左細妹之後肚B一直都瞓奶奶房，老公等我坐完月先開始裝修工人姐姐瞓果間房（其實只係換牆紙 ^^"），之後先去訂床，所以等到宜家肚B先有自己張床。

        

我地去左土瓜灣家近家計會對面嘅傢俬舖訂床，問左幾間碌架子母床連床頭櫃個價錢由4千尾至6千頭不等，最終我地揀左一間要$5,000訂左左依款米奇碌架子母床畀肚B。工人姐姐瞓上面，肚B瞓下面，萬一有啲咩要照顧小朋友就瞓子床。

        

遲左影相，已經畀奶奶綁左兩條繩要黎晾衫 =.="

   
其實裝好床後肚B都鐘意走上床玩，不過奶奶有一晚問佢想唔想響度瞓就話唔制，所以我就佈置下間房，響下格床啲櫃同天花，仲有窗上面貼左啲公仔玻璃貼


     
一早買定公仔床單，又將肚B最鐘意嘅公仔放響房

       

前晚第一晚試瞓，我如常陪到肚B瞓著就走，到零晨5點起身泵奶見間房開左燈，工人姐姐話肚B 4點就醒左響度玩又同公仔傾偈，姐姐叫佢又唔瞓就陪住佢。肚B見到我就痴住我，我叫姐姐休息同埋叫肚B入我地房瞓，我就照泵奶。點知佢都唔瞓，之後仲要起身，見都差唔多泵完奶就陪肚B直到佢返學。

        

不過肚B醒左唔係衝去我地房已經係成功嘅開始（響奶奶房瞓，扎醒第一時間衝去我地房），所以尋晚再試，結果肚B可以一覺瞓到天光呢！其實我好鐘意陪住肚B瞓覺個溫馨感覺，所以佢唔洗我陪之前，我會繼續陪佢瞓著先走架。

        

題外話，話說要買床褥畀工人姐姐同肚B瞓，唸住買啲平平地嘅，老公話奶奶果張床褥$200，但奶奶話都買左10幾年啦，間舖唔知仲響唔響度。我地照試下去搵啦，原來間舖仲響度（響旺角上海街近朗豪坊斜對面），3尺床褥最平$218都有，我地就㨂左奶奶果款都只係賣$248，真係抵到爛呀，佢仲有啲細少少尺吋（33吋闊）嘅床褥係預放上層床添，不過子床床褥就要訂造先有。張床褥可以捲起黎放上的士，好方便。如果大家要又平又舒服嘅床褥，可以考慮下呀。

     
就係依間錦發繡品公司，除左床褥，枕頭同被都好平架

     
門口就放晒啲床褥可以睇款，由勁軟到勁硬（椰棕床）都有