香港康復學會：綜合評估

有次返肚B學校聽講座，知道學校可以用$220轉介去香港康復學會做綜合評估（註：原價話要$1800 - $5000，不過上網睇原價做1個鐘評估，但$220就得半個鐘。做完依個$220嘅評估，我覺得佢肯定唔值$5000），因為擔心肚B表達同理解方面嘅問題，所以就同校長報名做評估。

       
宣傳單張

來源：香港康復學會網站
         

等左一個月都冇聲氣，經肚B班主任幫手跟進，終於約左尋日下晝去做評估。咁橋，等左幾個月嘅CAC都安排左同一日上晝見言語治療師做評估。

     
我地準時去到香港康復學會最近屋企嘅一間治療中心，等左一陣就有位兒童發展顧問帶我地入間房仔，我陪肚B坐響佢對面，而老公就坐側邊睇。

         

成個評估過程好簡單，包括：

• 用繩穿窿
• 搵相同物件嘅拼圖，考認知同埋拼埋一齊
• 用唔同形狀同顏色積木考聽指令去疊高
• 用英文字母同數字拼圖，考認知同埋砌番落去
• 用圖卡去考認知，如眼耳口鼻、排隊
• 響評估過程睇小朋友有冇眼神接觸、專注力等等

         

做完個評估，曾姑娘話肚B認知OK但表達能力方面弱啲，唔識點運用啲詞彙出黎（依點同CAC蕭姑娘講嘅一樣）。有時問佢啲野唔明會重覆你番說話一次，係幫助緊自己去理解果樣野，好似有張圖卡有人排隊等車，肚B起初見到淨係講「排隊」，曾姑娘指住圖卡有架車嘅牌問排隊等咩野，肚B照講「排隊等咩野」，隔左一陣就講「車」。其實依個情況經常出現，之前我會好擔心，但見到依個例子我先明白。
       
佢建議多啲同佢玩韆鞦同氹氹轉，因為感統會影響埋講野（即：講野同唸野個速度唔協調），同佢溝通個指令要盡量正面同埋簡單（如：唔好話「唔好咁咁咁」）。另外，問肚B問題除左選擇答「要A定B？」，可以嘗試加深個問題，如：「有A同B，你想要邊樣？」

       
其實成個評估過程好短，曾姑娘都望左幾次鐘，同埋佢畀果份初步評估都好簡單，就各方面能力淨係得「較強 / 平均 / 較弱 / 遲緩 / 不適用」幾個選項去剔，另外有幾行就寫番有咩其他問題同建議，真係幾簡單。
         

佢話佢星期六有班語言小組，宜家有2個約4歲小朋友上緊（最多5個人），佢建議肚B上小組堂，主要教認知同埋點運用番啲詞彙出黎。我仲爭扎緊好唔好上，因為佢唔係言論治療師，個過程又唔畀家長參與，咁我唔可以學到個技巧再響屋企同肚B練習。不過，佢係勝在近屋企同埋算係平（$200一堂有45分鐘，一期有5堂），因為我上網search啲言語治療都要起碼7百幾一堂，如果長期兼密集式訓練真係好甘呢。
       
好苦惱...