- 第5日 -- 平均每次泵到30ml，肚B每餐食60ml，要隔一餐餵肚B飲奶粉
- 第12日 -- 平均每次泵到50ml，肚B每餐食60-75ml，可以餵2餐母乳先餵1餐奶粉
- 第17日 -- 平均每次泵到55ml，肚B每餐食75ml，淨係臨瞓同半夜先餵奶粉
- 第35日 -- 平均每次泵到90ml，肚B一日7餐，每餐食120ml，終於開始全母乳餵哺
註：肚B一開始1、2個鐘一餐，到滿月開始tune番日頭3個鐘食一餐，夜晚肚B叫食先餵
其實響肚B一個月左右已經可以連半夜果餐都餵母乳，不過老公唸住餵奶粉等肚B飽肚啲可以瞓得耐啲，所以我都儲到3包冰奶。我覺得咁樣有啲遺憾，所以間中就叫老公試下餵母乳，結果實驗證明就算半夜餵肚B飲母乳佢都一樣瞓到5、6個鐘，所以就開始左全母乳生涯啦！
窮媽的糧倉
之前見有個網站（http://kidslead.com/category/bft）講泵奶方法，只要響生完頭4-6個星期每日泵8-12次，到個奶量穩定左就可以泵番少啲。雖然我宜家每日都泵到7-800ml母乳，但我仍然要每日泵8-9次先可以追到肚B個食量，所以真係追得好辛苦！試過飲花生木瓜雞腳湯、魚頭湯、黑豆茶都冇乜用，係前日試過飲黑豆漿先好似有少少效果，但之後冇再明顯上升！宜家就話放緊產假可以每日響度喪泵，遲啲返工冇得泵咁密一定唔夠肚B食，真係好羨慕其他一日泵4-6次就有成1000ml嘅泵媽…
最近得閒睇番香港母乳育嬰協會個網站內容（母乳成份日夜大不同 | 奶瓶餵奶取代親餵 寶寶易發胖），加上宜家肚B大個左吸吮能力好左，我有爭扎好唔好轉番埋身餵。不過仲有個半月就要返工啦，同埋老公覺得咁樣先知道BB食左幾多，所以我宜家只係做人肉奶嘴間中畀肚B啜下，當畀肚B濕下喉嚨同埋感受下果份親密嘅感覺。
題外話，肚B出世係偏細碼只得6.2磅，只係響10果條生長線，但到肚B一個月去打乙型肝炎針時，佢已經有9.4磅仲上番50果條生長線啦（果然用奶樽餵肚B係會肥D）。雖然我之前唔算全母乳餵哺，但都有七成呀，所以見到有依個成績更加支持我去繼續努力呀！
BB生長線
來源：健康院書仔
肥脾（出世幾日 vs 滿月）
