Medela奶泵壞左？！

之前買左部Medela Swing奶泵，用左個半月就壞壞地啦！
 
起初我都唔留意，明明我隔2個鐘泵奶的話，用手按壓個胸都會有奶出，尋日按極都冇乜奶，跟住用左10分鐘突然間個吸力大左，我先知道原來因為唔夠力所以泵唔出奶。打電話去Medela個代理（尚健醫療），佢叫我檢查奶泵個喇叭活門同埋白色塊膜有冇爛，我睇過又冇問題，佢話如果維修要等一個星期！大佬，手停口停呀，點等到一個星期。
 
不過之後再用幾次又冇事，唸住捱多一排先，點知尋晚半夜起身泵奶又黎料！平時按4-5下「+」已經有奶柱出，但個奶泵好似冇乜力，泵左好耐都得好少，唸唸下好擔心泵唔切奶就喊左出黎。
 
到今朝起身再泵又係咁，後尾按多幾個「+」先同平時個吸力差唔多，所以都照泵先，但個摩打聲大嘈啦，如果半夜起身泵驚會嘈醒老公同肚B，所以決定去尚健銅鑼灣個門市整機，必要時最多買個手泵用住先。
 
去到門市，個職員先檢查個喇叭活門同薄膜，之後就用個氣壓儀去檢查我個奶泵吸力，發現真係唔夠力，之後就試下幫我洗泵。佢拆開放電池個蓋同拎開塊海棉，將奶泵個吸力教到最大，跟住一邊倒少少水落左上角個窿，一邊用紙巾響下面個窿索番啲水，之後再檢查個吸力就正常番。個職員話因為啲奶入左去所以先咁，我問個職員如果之後再係咁我係咪可以用依個方法去解決，佢話可以先咁試一試。返到屋企即刻試泵，又真係正常番喎。原來咁簡單，如果上網search到我就唔會特登出去整機啦（有時間瞓下仲好！），所以post出黎，希望遇到相同問題嘅人可以試下。