全泵媽：一日泵6次

因為肚B打完針要半夜check住體溫，加上前排開始覺得個人太攰同埋成日頭暈暈，所以早幾日開始試下減少泵一次，改為一日泵6次（泵奶schedule：03:00、07:30、11:30、14:30、18:30、22:00），結果奶量冇減到反而仲有升少少，可能真係休息多左而多奶呢！
 
其實自從一日泵7次之後，我每日個奶量都係差少少到1000ml，有幾日奶量少左100ml，我就叫奶奶煲黑豆漿再整通草豆漿飲，結果出奶順番同埋上到1000ml鬆啲，宜家改泵6次都仲keep到個量，甚至試過幾次係泵1次就有200ml，真係我嘅歷史新高。
 
泵左咁耐，我發覺引奶陣真係好重要，因為啲奶量真係會多啲架。Medela Swing佢開機預設有個按摩模式，以前唔識就淨係死磨爛磨咁泵死一邊先轉另一邊，宜家我會一開始先泵谷啲果邊，泵到冇乜奶柱射出就轉另一邊，另一邊都冇奶柱又再轉，然後就會熄機再開始機用番佢個按摩模式去引奶陣，有奶陣的話就泵完一邊泵另一邊，之後再引奶陣。雖然唔係次次都引到奶陣，但足以令我嘅奶量提升啦。
 
我知有啲人出奶好似花灑咁，我朋友直頭唔洗用手按壓都泵到好多奶。唔知我係窮定點，谷奶果時一開始泵奶都有3、4條奶柱（嚴格黎講應該叫「奶線」），幾分鐘之後就會淨番1條，要用手按壓先會多番奶柱出，每次泵奶又會兩邊加埋泵35-40分鐘，久而久之兩邊手腕都有少少痛。係辛苦啲，不過為左BB係值得架。
 
仲有兩星期就要返工啦，到時冇得磨爛蓆又要泵番密啲，不過可以襯依段時休息番多啲，因為到時返工一定好辛苦要重新適應啦。