不過冇法子，都要調整番返工嘅心情，同埋準備返工泵奶嘅野啦。我有個同事都係返工泵奶餵到肚B宜家7個月大，聽佢嘅經驗我準備左以下物品方便返工泵奶（事後補充見藍字）：
- 電奶泵：唔捨得買多個，唯有每日走難咁拎返公司泵奶。遲啲唸住買定多個手泵，因為睇其他媽媽分享，電泵始終係跟住頻率一下下咁泵唔夠快，手泵就可以響短時間快泵，放便有時忙或者要開會時可以用手泵快手搞掂。
>> 結果我泵奶越泵越順，冇買到手泵。
- 電芯：我公司廁所裡面有間房仔，裡面有一個插蘇位。由於我同事都要泵奶（大家好熟嘅），帶定電芯萬一我谷奶佢又泵緊奶，而佢又可以share間房黎用，咁我就用電芯黎泵奶。
>> 由於同個同事時間夾得好，唔需要用電芯。
- 奶樽：初步唸住返工最少泵2次，如果冇出去食飯就lunch泵1次，要OT就放工前泵1次，所以要帶定2-4個奶樽。
>> 預返工泵奶次數帶相應數目嘅奶樽就OK，如果有咩事（如：塞奶）要泵多次，可以泵完放響奶袋，奶樽同奶泵parts就用滾水淥下。
- 奶袋：放定幾個響公司做後備。
>> 真係有用架！
- 奶樽清潔液：泵奶個喇叭好多油脂，所以用清潔液洗左先會好啲。
>> 我同事就咁用滾水淥啲奶泵parts，不過我就鐘意洗洗先。
- 膠盒：一個放得落奶泵個喇叭同配件嘅膠盒，響公司淨係用滾水浸住啲配件黎消毒。
>> 有用，用黎消毒奶泵parts。
- 不透明袋：用黎放啲泵好嘅奶，我用啲不織布袋整左個可以放4個奶樽嘅袋，中間縫啲線同埋底部用個膠file墊底，咁就算放1個奶樽個袋都唔會瞓低。
>> 依個唔一定嘅，不過為免同事尷尬，我覺得會好啲。
- 冰袋：我買左Fridge-to-go "Ace" 果款，佢話可以放到4罐汽水。FTG個冰袋只係前面同後面有冰種，所以我夾硬塞都塞到3支Chu Chu 8oz奶樽響底，面再放多2支Medela 5oz奶樽。
>> 泵奶必備，不過依啲款個冰種冇得拆出黎，會霸住雪櫃好多位，FTG好似有款話專放母乳，不過其實只係可以拆啲冰種出黎，但就貴好多。
- 毛巾：用黎抹手抹胸用。
>> 有用，如果懶就用濕紙巾都OK。
- 濕紙巾：放定響locker備用，都係用黎抹胸。
>> 我只係用黎做後備，冇計啦，我慳家呀。
不過始終我泵奶出得慢，返工冇可能磨爛蓆，如果計埋set up清洗半個鐘內搞掂，我只可以泵25分鐘。依排響屋企泵奶都有睇下25分鐘泵到幾多，只係得4-5安奶咋！如果返工個奶量冇大跌，我半夜同朝早果2次照泵到400ml，返工隔4個鐘個胸谷少少先泵2次要有300ml，咁我放工返屋企再磨爛蓆泵番2次有200ml，咁成日有900ml都剛好夠肚B食。
其實自從改左一日泵6次之後，我個奶量不跌反升，近排仲上到1100ml。所以就返工我都慢慢試下泵短啲時間，由每次2邊加埋40分鐘，試下泵35分鐘個奶旺都keep到。今日唸住試泵5次每次30分鐘，暫時泵左4次都有800幾ml，見到依個成績真係好感動，亦都加強我返工繼續泵奶個信心。加上依排啲奶粉又話有問題，更加令我有決心去繼續落去
