不過勤力終於有回報，宜家一日泵7次（每邊泵20分鐘內）都可以超額完成，仲可以開始儲冰奶。宜家可以3-4個鐘泵一次（泵奶schedule：02:30、06:40、09:30、12:30、15:30、18:30、22:00），可以泵完奶餵肚B仲有時間食下野休息一陣先再泵奶，有時仲可以上網update下個blog添！
當初決定餵母乳，聽朋友講只要有決心就餵到，但起初真係遇到好多挫折同困難，所以post出黎畀決心餵母乳嘅網友可以參考，做足心理準備：
- BB成日瞓覺：
初生BB成日都瞓覺（通常初生BB都有黃膽會好攰），埋身餵原則上feed on demand，初時我見肚B日頭可以瞓到4個幾鐘先喊醒，但其實BB唔醒都要每隔2-3個鐘餵一次。到知道要定時餵肚B，又發現肚B真係好懶瞓，好難叫醒佢飲奶，有朋友教大力掃風、彈肚B腳板底都冇反應，結果只係肚B喊果時先餵到佢，可能因為冇畀肚B密密啜所以上奶慢。到宜家多左經驗，我覺得用少少凍嘅濕毛巾抹面會較容易醒。
- 埋身餵完一放落床又喊：
肚B出院果日我係全埋身，日頭都以為自己餵得OK，但到半夜每次肚B啜到瞓著，一放落床又喊，再抱再餵又瞓著，放落床再喊。我知如果要餵母乳一開始係會好辛苦，所以我都照埋身餵，不過半夜咁喊法嘈醒埋奶奶，佢係咁話肚B唔夠飽，當時我唔夠瞓已經覺得好辛苦，結果開始餵第一餐奶粉，肚B飲完奶真係瞓覺。其實唔知係咪因為我出奶慢所以肚B唔夠飽，啜啜下瞓著都可能因為佢啜到攰。
好多媽媽會堅持唔補奶粉，因為BB出世有儲備可以捱到2-3日，越補奶粉BB啜唔夠咁啲奶就越少。我自己就覺得，奶粉唔係毒品，我唔捨得畀肚B捱餓，如果擔心肚B啜得少而奶量少，補奶粉嘅同時係咪可以用泵去刺激呢？不過泵嘅次數要多個BB食奶嘅次數，初生BB一日又食好多餐奶，如果埋身餵完補奶粉時又泵奶，真係唔洗瞓覺。同埋餵開樽啖啖有，要埋番身BB要用力啜先有，BB有少少抗拒埋身架，所以如果決定左埋身真係要堅持呢！
- 屋企人嘅說話：好幸慶老公好支持我餵母乳，其實我奶奶都支持因為想當年佢都係咁餵大我老公，不過肚B係咁喊，奶奶只係講事實話BB唔夠飽，已經嚴重打擊我同埋令我好大壓力。如果有啲屋企人直頭唔支持餵母乳，孤軍作戰真係好慘，所以想搵支持可以上討論區啲母乳版呀，有人鼓勵好好多架！
- 啜損乳頭：
睇討論區話BB啜得啱係唔會痛，如果損左可以用人奶或羊脂膏搽乳頭會快啲好。但係當兩邊都損左而BB又啜得密，根本冇時間等傷口好番，結果我選擇左泵啲奶出黎。其實如果堅持到，應該多去健康院搵母乳指導幫忙，因為就算上網睇短片教學（香港母乳育嬰協會 | Jack Newman ），到實戰時都未必真係做到。
- 谷奶變石頭胸：
我自己就生完第4日變石頭胸（通常生完頭幾日）又硬又痛，直頭硬到我打側瞓兩個胸會夾出條罅。果時我唸住泵啲奶出黎但個胸太實，泵到個胸變左圓椎形但兩邊加埋得半安奶又舒緩唔到痛楚。其實可以用毛巾熱敷同按摩，等個胸鬆少少再畀BB啜或泵奶，果時我畀肚B啜過3次開始冇咁實，之後再泵出黎終於冇事。
- 乳腺塞（乳房／乳暈有硬塊）：
解決左石頭胸，但發現乳房同乳暈都有硬塊，連泵奶都係一滴滴咁出。上網睇可以食「卵磷脂」令啲奶冇咁杰會易啲通番，不過老公唔贊成食依啲丸，問過健康院姑娘同埋母乳顧問，都話要熱敷同響硬塊位置打圈按摩但唔使太大力，母乳顧問仲建議我乳腺未通之前用手擠奶。當時真係好心急，試左好多次都唔得，又試過用按摩器去震啲硬塊，好似好啲但塞左嘅位好快又硬番，後尾改用手擠慢慢先有改善，結果用左幾日先冇硬塊。
- 冇奶柱：
乳腺通左少少，但泵奶或擠仍然都係一滴一滴咁出，出奶真係好慢。後尾見討論區有人話用手擠會易啲通乳腺，擠左幾次出奶開始有啲噴泉暗湧嘅效果，到10次左右終於有第一條奶柱出現！因為有成績，所以連續6日都用手擠奶每日擠8-10次，擠到姆指同食指赤赤痛，連拎筷子都冇乜力。因為已經有奶柱出現，所以就改番用泵。同埋用泵的話個力度可以教大少少，再加埋用手去按壓，會易啲有奶柱同埋出奶快啲。
- 唔上奶／唔谷奶：
通左乳腺之後發覺好似唔谷奶，個胸長期「淋慈慈」。果時因為坐月因為要戒口，奶奶冇煲過上奶湯水畀我一係就話花生毒，一係就話木瓜涼，所以果時我真係喪飲水，每日6、7碗白飯。到坐完月試過幾款湯水同食物都冇谷奶，結果我自己煲通草豆漿有少少料到，宜家3個鐘度就有啲谷奶feel，再飲番奶奶煲過嘅湯水會更加谷，尤其係零晨時間。不過，我相信每個人體質唔同效果唔同，其實要trail and error先搵到最夾自己嘅上奶飲食。
- 泵奶泵得少：
初時我泵成粒鐘兩邊加埋得半安，後尾上網睇其實好多人都有同樣問題。我頭幾日一日泵6次每日得10安奶，之後勤力啲每日泵8-11次，啲奶量先慢慢升，到宜家可以泵到約30安奶。每日唔同時段泵奶個奶量都會唔同，所以最好睇每日個總奶量先可以作準。努力左一個月我先追到BB每日食量，到宜家我仲有多可以做冰奶添。
- 奶陣（即：噴乳反射）：
對我黎講有兩種奶陣，一種係隨時出現個胸有刺痛感覺兼且谷實左，朋友話有奶陣時會噴奶但我只係會滲1、2滴，要泵奶時先會噴奶（唉 =_=!）。另一種係泵奶時出現，個胸有啲麻痺感覺啲奶又係出快啲。上網睇有好多引奶陣方法，例如：睇BB相、聽BB喊聲、幻想BB啜緊自己、飲水，或者用手刺激乳頭。依幾個方法我都唔係點引到，反而用奶泵個按摩mode間唔中可以引到奶陣。
雖然餵母乳係辛苦，但係都有唔少趣事，而且攬住肚B真係好溫馨，令我覺得幾辛苦都值得架！
