食完飯過一陣沖涼，已經覺得左邊胸有一忽開始硬硬地，所以尋晚提早泵奶，泵完就冇乜事。到半夜2:30起身泵奶又硬左，想泵都泵唔出，我仲大安旨意食2粒卵磷脂再瞓覺，唸住朝早起身再泵啦，點知連今朝都泵唔出！我開始慌啦，因為之前塞奶都係食完卵磷脂就泵得出架。
今朝照返工，返到去覺得個胸又實啲，所以再食2粒卵磷脂唸住過2個鐘再泵奶。等等下唔對路，個胸越黎越硬，開始唔掂都痛，所以10:30再試泵，都係泵唔出，因為塞緊我唔敢再引奶陣驚塞得仲勁，依轉只係泵到140ml，比平時少左起碼2安奶，真係好擔心呀！
我同上司請假即刻返屋企急救，係咁用熱水fair個胸希望可以出到奶，但好似冇乜幫助，左胸塞果忽已經連乳暈都塞到腫埋。之後，突然見到乳頭有粒約2mm大嘅白點，係咁用毛巾擦都唔甩。平時啲奶垢用毛巾擦就甩，我唸起有人講過乳頭白點係因為啲奶塞響出口，只要用針挑有奶噴出就冇事，唔通依個係傳說中嘅白點？
結果，我用支牙籤撩下粒白點，有啲奶滲出黎，之後粒白點冇左，我再試泵終於泵到出黎，結果唔夠2個鐘又泵左180ml出黎（硬果忽肉塞左近10個鐘），個胸亦都鬆番晒啦。唔知點解今次會無端端塞到咁，不過好彩都解決左，呼
返到屋企時肚B瞓緊覺，泵完佢又醒左，好彩今次搞得掂，好驚因此而少奶餵唔飽肚B呢！為左肚B，我會繼續努力，目標要餵到1歲 
