本來打算到肚B開始食固體先減泵半夜果轉奶，但係因為種種原因，我前日開始改泵一日4次（泵奶schedule：06:30、11:30、17:00、23:00）。好彩，總算順利過度，宜家夜晚泵完奶"暗"埋肚B瞓覺，可以連續6個幾鐘瞓覺（不過谷奶谷到個胸變晒形，我有食定卵磷脂防塞），而且奶量都keep到夠肚B食（泵到34-36安，BB食30安不過多數食唔晒）。
好多人話餵母乳慳錢，其實餵母乳好貴，尤其係做泵媽仲貴，貴在響個機會成本。餵母乳唔可以假手於人，困身唔在講，瞓得少又唔夠精神，半夜起身見老公同肚B瞓到好淋，自己就開住手機盞燈仔黎泵奶，仲有谷奶塞奶嘅痛，真係做奶媽先會明白。由於我一開始唔夠堅持做左泵媽，因為要追奶同埋半夜泵奶好攰，所以通常係奶奶同老公餵奶。到肚B開始大啲，可能因為泵奶而少左親子嘅時間，我發覺佢見到奶奶同老公會多啲笑，我真係有啲心酸。好多人話埋身餵BB會痴身啲，所以我近期有試過埋身，但肚B已經唔知乳頭為何物，望住我，皺住眉，就算塞埋嘴仔都唔啜。
過去左嘅時間就追唔番，所以我決定提早改泵4次，希望可以精神啲，希望多啲陪肚B玩等佢痴下我啦。
尋晚放工返屋企，一開門就聽到肚B笑，原來老公同肚B玩緊，只係叫「BB」就笑到格格聲。我跟住叫，唔笑；老公再叫，笑。我心唸係咪鐘意我老公把聲呢？我扮講野老公配音叫「BB」，唔笑；老公扮講野我配音叫「BB」，唔笑；我老公再叫「BB」，笑…
雖然我個心真係好酸，但見到肚B笑得咁開心，我都好開心
