響生之前要準備BB床，其實我淨係唸起木床，不過有個朋友話買網床可以等BB大個時響裡面玩，所以我就上網搵資料啦。通常啲人話擔心用網床會對BB脊骨唔好，不過網床底部有塊硬板承托，只要加張床褥去用就OK，我見都OK呀所以就買左Babytrend嘅網床。
一開始用網床，因為張網床佢有兩層，初生BB放上層可以就咁響上面換片，佢又有個架可以放換片工具，我覺得幾方便！
不過佢上層只可以承受一定重量，到肚B大約3個月時就唔可以用上層，但係放下層又太低喎，所以要搵野墊高張床褥。
之後問題又黎啦，就係肚B成日畀蚊針！唸住買啲蚊帳，但通常啲蚊帳都係for木床用係要用螺絲上響啲木架度，網床用唔到正常蚊帳，一唔係就要用啲座地蚊帳。我淘寶搵下啦，原來淘寶有Babytrend專用蚊帳，總算又解決到問題。
Babytrend網床蚊帳 @ RMB20（http://shop100382394.taobao.com）
不過到肚B開始識扶住企，同埋有時半夜會無lala扎醒，問題又黎啦，就係會畀個網笠住個頭仔。冇計，唯有佢扎醒就除蚊帳，不過變左有時就要畀蚊針。另一個問題就係，肚B識得企起身，識得拎個架上啲野黎玩，本來唸住好方便可以濕紙巾個架，宜家只可以放肚B啲玩具（好彩下面果架放尿片仲用到）。
到肚B識自己企又周圍走，咁啱見到燒腩仔媽媽響淘寶淘左啲大塊playmat畀燒腩仔防撞，睇番佢個尺吋用黎墊Babytrend網床啱啱好，所以就淘左4塊2.5cm厚嘅playmat黎墊底（3塊放底，1塊放牆防撞）。由網床個底嘅四角係斜左上去，就咁放張床褥係唔平，用90cm x 60cm playmat墊底就啱啱好兼且好安全。
大塊playmat @ RMB20一塊，送去dimbuy廣州集運點要RMB22，紅色playmat啲花紋有錯體（http://shop101028500.taobao.com）
雖然肚B響網床入面玩冇咁易撞親，但都仲係有個問題就係張床太低，網床唔似木床可以有教低一邊床欄，所以當肚B瞓著果時要放佢落去條腰要彎得好低。
可能我屋企潮濕，所以張網床發晒毛（連牆紙都發毛>"<），要洗都幾唔方便。我試過用濕毛巾整啲皂液可以抹走啲黑點，但點都唔夠木床用床圍可以折出黎洗咁方便。
唉，所以用左咁耐，其實我都有少少後悔，但宜家先買張木床又覺得好嘥，屋企暫時又冇位放小童床，所以希望大家可以唸清楚先決定係咪將網床當BB床啦。
