當日老公都有打畀我，話份問卷好多野要填，又問家長就小朋友嘅視覺、聽覺、語言…好多方面有咩擔心同埋要舉例子。咁講填除左肚B遲講野，我都有其他擔心架，好似：
- 未識表達自己意願，唔要嘅野只係講BB話同埋推開，唔識示意大小便
- 屋企成日都擒高擒低，返學仲畀老師話坐唔定，成日離開自己個位（雖然慢慢有改善，有興趣嘅事物會專心坐定定咁聽）
- 就算去公園玩都好似唔專心，成日會依度玩一陣就去第二度玩一陣，兜黎兜去冇時停
老公話填完問卷之後姑娘都問番好多野（有啲佢講完我唔記得左 ^^"），仲畀左份問卷學校填。因為肚B返埋冬至就放聖誕假，所以我上星期就放份問卷響肚B功課袋，請老師幫忙填。不過第二日老師打畀我，話要畀埋個信封佢地，因為學校填完會由校長寄出架！等我仲唸住可以睇下學校個評估添～
姑娘話大約等9個月，會再call我地覆實個期。其實我睇BK都話要排好耐，唯有等電話睇下會唔會有得早啦！
尋晚老公屋企做節，老公個姐夫都講番之前個囝2歲先開始識叫「爸爸」，當時健康院即時轉介去CAC評估，話語言遲緩仲有輕微自閉症傾向，宜家讀小六咪又係正常人一個。雖然咁講，但我唔排除係黃金治療期有適當治療所以冇事，所以有得排CAC我都會照排先，不過就未擔心到要出去搵私人機構做評估，希望到時肚B都已經有好大進步啦！
依份就係畀學校填嘅問卷，好彩之前影低左
