醫生首先跟進番肚B血管痣個情況。肚B出世時眼皮同埋陰部有血管痣，其實眼皮位就好快退左，但因為陰部個位置都大（大約2 x 1cm）而且有少少凸出黎，所以當時個醫生幫我地寫轉介信去左廣華見專科。暫時都係定期覆診檢查，唔需要藥物治療，雖然個位置冇細到，但中間多番啲肉色唔係全紅色血管痣。
之後醫生問我肚B講野個情況，肚B主要講到單字或者兩個字詞語，最近依個月我地講咩佢都會跟住講到啲詞語。醫生問肚B大概講到幾多詞語，如果唔計跟口水尾講果啲，都起碼有幾十個，醫生話如果有50個都唔錯。
其實上次返健康院，姑娘話要先教肚B講組合字而唔係句子，我地跟住教，肚B依幾日都識講少少組合字，暫時可以講到「食奶奶」、「食餅餅」果啲（但係跟口水尾講），如果真係自己講嘅組合字，就有「Apple 批批」或者「批蘋果」，全部都係同食有關... XD
醫生拎左啲圖咭出黎考肚B，指住啲物件問肚B係咩，肚B大部份都可以住指同埋講出黎。之後換左另一啲圖咭係同動作有關，好似有個姐姐食蘋果同食飯，或者踢波同拋波，肚B就識一半。醫生都話可以畀多啲認事物圖咭畀肚B，等佢識多啲詞彙。
然後醫生拎左啲唔同顏色、形狀、大小嘅積木，考肚B分顏色、形狀同大小咁疊高積木，肚B都識。不過醫生用積木砌左啲形狀叫肚B跟住砌，佢就淨係識將手上啲積木疊去醫生啲積木上面。
醫生再拎左啲玩具出黎，有啲物件有啲容器，叫肚B將個波放響杯裡面，或者將把梳放響個盒裡面，肚B都識。我地有時都同肚B玩煮飯仔，醫生換左另一set玩具，叫肚B用匙餵個BB公仔食野佢就唔識，不過平時玩煮飯仔，啲野放響碟上面肚B都識用匙拎黎食，或者直接拎住件野質落我地個口餵我地食 ^^"
除左語言能力，醫生都有考肚B其他野，好似拎個樽仔畀肚B開個蓋，叫肚B倒個樽仔入面粒糖出黎，再叫佢拎番實個蓋，肚B都做到。跟住醫生拎左紙同筆畀肚B，叫佢寫野但係肚B只係自顧自咁畫野，而且寫畫得好淺色。醫生話可以畀佢多啲畫野，但其實肚B返學都有填顏色，而我都有淘啲填顏色晝畀肚B，佢都有意識填唔出界，不過都係好豪邁咁亂填。醫生問有冇擔心肚B小肌肉發展，咁又冇喎。
醫生話其實肚B理解能力係OK，講啲咩大部份都明，係唔肯講，醫生仲話肚B個語言能力有兩歲（我心唸，人地兩歲講野好叻架啵 @@）。跟住都有問我地有咩其他擔心，我就話肚B返學都係坐唔定，但醫生話咁細個都係正常可以再觀察下。
跟住醫生話肚B都返緊學，而且宜家好多小朋友都遲講野，可以3歲再返黎，到時視乎情況再轉介，不過都可以睇我地意願係咪想早啲轉介。由於聽一仔媽講轉介都要等半年先正式評估，所以我請醫生幫我地轉介。結果我地打去專科約左17號下晝先見姑娘登記資料（唔洗帶肚B住），之後先再睇下排到幾時做正式評估…希望可以排期早啲啦，等我都可以安心啲！
