肚B出世果時，因為堅持埋身餵哺母乳，搞到肚B返健康院時輕左好多，半夜佢唔夠飽又一放落床仔就勁喊，所以後尾轉左做全泵媽。睇番肚B果時，我追奶追得好辛苦，一日泵10次每次兩邊加埋泵45分鐘，追左成個月先追到肚B食量，每次泵到90ml（回顧：全泵奶媽），不過之後越泵越順，最終餵到肚B 14個月掛泵。
第二胎…
今胎唸住有經驗，又揀左響政府醫院生，應該會好順利啦…點知又係餵到乳頭損晒甚至裂開，就算開刀第3日上奶，畀細妹啜完個胸都係冇鬆過，響醫院果幾日都唸過兩次想放棄（不過為左細妹，好快又重新振作）。
細妹出世重3.04KG，住院期間跌到最輕得2.8KG，響出世第4日出院，我仍然堅持埋身餵，因為一黎想細妹幫我啜通啲乳腺，二黎唸住可以慳番又泵又餵嘅時間。我有認真記得細妹幾時餵奶，一日有幾次小便／大便，見佢半夜又唔會好似肚B果時間餵完一放落床仔就喊，仲以為自己成功埋身餵，點知到第6日朝早返健康院磅重，細妹再輕左得2.74KG，連醫生同姑娘都建議我要補泵奶，反正返工都要泵奶，所以我就索性變番全泵媽…結果，過兩日再返健康院細妹就重番有3.03KG。
其實今胎比上胎順利好多，基本上一改全泵已經可以全母乳。我一日泵8次每次兩邊加埋泵20-25分鐘，每日奶量都有上升，！我覺得今次成功，主要係因為一開始就選擇用手擠奶。講真，響醫院果時手擠都係得好少咋，不過個奶量都可以慢慢上升：
- 第3日：開始上奶但細妹啜完個胸都唔鬆，開始用手擠出黎但得1、2ml少得可憐要用針筒吸番啲奶
- 第4日：零晨開始谷奶，用手大力響硬塊打圈先手擠，開始擠到20ml
- 第5日：仲堅持緊埋身，埋身後先手擠+泵，都係得20ml
- 第6日：開始手擠+泵，一日8次兩邊加埋約30-40分鐘，平均每次有45ml（細妹食50ml）
註：由於我上奶之後個胸谷左一排，用電泵會泵到乳暈都腫脹，所以我會先手擠乳暈到胸中間部份（因為前邊塞左後面啲奶都出唔到），而胸中間到周圍因為較實，我就選擇用泵再用手按壓。 - 第8日：開始全泵加用手按壓周圍，一日泵8次兩邊加理約20-25分鐘（泵奶schedule：半夜3-4個鐘1次，日頭2-3個鐘1次），平均每次有60-70ml
- 第12日：奶量每日都有上升，平均每次有90ml（細妹食70-80ml）
- 第13日：單次最高泵到130ml（相隔4個鐘），開始試一日泵7次兩邊加埋約25-30分鐘（泵奶schedule：03:00、07:00、10:00、13:00、16:00、19:30、23:00），因為少泵1次所以個總奶量少左
- 第14-20日：平均每次泵到110-130ml，總奶量上升番
- 第21-22日：依兩日奶量突然少左，引唔到奶陣，有時要泵40分鐘先夠110ml（細妹食100ml）
- 第23-26日：記得BK有人話鈣思寶可以增奶，咁啱屋企有一包就試下，飲完容易引番奶陣，奶量上升番甚至單次最高泵到150ml（相隔4個鐘）同埋每日總奶量有900ml
作為一個奶媽，最開心莫過於見到BB有一雙肥脾（攝於4月4日，第17日）
雖然奶量一直都比細妹食量多，但我都唔敢偷懶，因為之前睇資料話頭一個月要建立個穩定奶量先，一日要泵8次（唔可以少過6次），見有人話一日泵7次之後奶量跌我都有啲驚，好彩試過之後原來都keep到。其實睇BK有啲人一日泵4次加埋都可以有1400ml，咁即係證明唔一定要一日泵咁多次啦（除非窮要追奶）！
由於奶量有所提升，加上細妹間中夜晚食完奶唔瞓覺搞到好攰，所以響佢第27日大就試一日泵6次，目標係平均每次要有150ml先可以足夠細妹遲啲個食量，好彩都算順利：
- 第27日：開始試一日泵6次兩邊加理約30分鐘（泵奶schedule：03:00、07:00、11:00、15:00、19:00、23:00），單次最高泵到180ml（相隔4個鐘），每日總奶量有910ml。同之前由8次改泵7次相比，減泵1次個奶量都仲keep到
- 第28-35日：每日總奶量大約950ml，泵左幾日又開始又好似難左引奶陣，多數1次只泵到150ml，間中先泵到170ml，唔知係咪我泵與泵之間少左飲水，所以試下煲通草豆漿飲，同埋飲番多啲水，又好似改善番
總結兩胎經驗，我覺得做全泵媽有以下技巧同注意地方：
- 生完之後盡快用手擠奶，只要擠通左乳腺，之後轉番泵無論係出奶速度同埋奶量都會好啲。如果一心決定做全泵，更加要一早就密密擠，睇BK見有人一開始就2個鐘手擠1次，BB頭幾日已經個奶量驚人。
- 飲勁多水，因為要造奶，我每次泵完都即刻飲一大杯水，泵與泵之間都飲起碼幾杯水，奶量真係會多啲。
- 泵奶時左右交替去泵（單泵）同用手按壓，務求泵清啲奶等乳房去造更多奶，我通常一邊泵到冇奶出就轉另一邊再泵。
- 要識引奶陣，因為個奶量會差好遠。有時泵泵下真係會冇奶出或者變到滴滴仔，引到奶陣就會又多番一陣奶，可以引完左邊泵晒兩邊，就引右邊，左右交替咁。至於引奶陣方法，上網search有好多，有人話用棉花棒清潔奶垢、用手拉址乳頭去模仿BB吸啜但我唔work。如果我飲足夠水，就咁用電泵個引奶陣mode都可以泵一次奶引到幾次奶陣。
- 增奶食品／飲品只作輔助，因為我開刀關係，奶奶響我坐月冇煲增奶湯水（依樣又話涼，果樣又話唔得 =_=），我淨係試過通草牛奶同埋鈣思寶，奶量冇明顯增加，所以我覺得要多奶，以上幾點反而重要啲，一開始辛苦啲好過淨係靠增奶食品／飲品。
註：不過，參考我第一胎經驗，飲過通草煲黑豆漿之後，飲增奶湯水真係會覺得谷所以奶量多左，但每個人都唔同，要慢慢試先知邊樣適合自己。
今日細妹返健康院打針同磅重，佢已經有4.1KG重啦！黎緊希望可以再試一日泵5次，如果細妹成功戒埋夜奶，我想響返工之前改泵4次skip埋半夜果轉添，希望一切順利啦！
