早幾個月上網搵左一啲非牟利同私人嘅言語治療服務，考慮左地點、交通安排同埋價錢，決定去「樂天教室」試下。其實我響3間治療中心留左資料，亦問佢地應該點揀適合嘅治療，不過係得樂天教室由個校長覆我電話，講左15分鐘同我分析番有咩影響語言遲緩，同埋建議要做個簡單評估先。
評估
同陳校長講完電話，就約左幾日後同肚B上去做評估，我大概記得玩左依啲野：
- 拎啲玩具出黎考肚B物件名稱。
- 睇圖卡考肚B個人做緊乜野（如：食野、踢波、游水）。
- 要肚B聽住順序用唔顏色（每次講3個顏色），一邊有個窿嘅顏色木棒插響膠墊啲窿窿度，再用繩穿起啲木棒。
- 叫肚B用積木去砌架火車出黎，再扮開車；再用積木整個山窿，可以用支筆穿過。
- 放幾個兜出黎，要肚B將唔同物件分類（如：交通工具、動物、食物）。
- 畀幅4x4格仔圖畀肚B，叫佢用顏色積木跟住幅圖去疊高。
- 放大概20個玩具圍成一個圈，叫肚B順住次序講個物件名稱。
- 拎4幅圖卡講故事，跟住撈亂叫肚B按故事內容排番出黎。
成個評估過程，肚B一路做，陳校長就一路講解佢個行為表現，同埋教我響屋企可以同佢玩啲咩。整體陳校長對肚B評語係：
- 智能方面冇問題，同年紀吻合。
- 專注力方面稍弱，應該係年紀x2.5（3歲應該有7.5分鐘可專注一件事），我以為肚B可以坐定就冇問題，但過程中手多多所以唔算。
- 聆聽方面較弱，通常唔可以專心聽完一個指示去跟足做番出黎（都係衰手多）。
- 空間感問題，叫肚B順序講物件名稱，間中會skip左一樣物件。
- 感統問題，叫肚B分類時成日好大力咁掉落個兜度。
- 眼神接觸較弱，要叫先望（不過如果我同肚B講野，佢會望我講野）。
本身想揀小組訓練，不過家長唔可以陪同，而我覺得最重要係學左個技巧可以響屋企做，所以最終揀個別訓練，希望可以針對番肚B已知嘅問題，真正幫到佢。陳校長話肚B個情況上導師個別訓練就足夠，因為響過程中可以執埋語言依part，另外就建議上埋社交小組等肚B多啲同小朋友交流。
社交小組
樂天教室個社交小組係逢星期六9:15-10:15，$300一堂，家長可以響房外面啲百葉簾睇小朋友上堂情況。小組嘅上半部份係一大班小朋友一齊玩一啲要郁動嘅遊戲（例如：用杯傳波、掉手巾），而下半部份就去細房玩啲分組枱面遊戲（例如：配對、鈎魚遊戲），響過程中又會叫小朋友要講野。
上左個幾月，我覺得對肚B幫助唔大，因為有啲說話佢唔理解會背埋啲對話，而且又排到導師嘅個別訓練，所以我就停左社交小組。
導師個別訓練
$600一堂可隔個星期上，不過我揀左每星期上，希望肚B可以快啲有改善。上左3個月堂，其實都係透過遊戲去學習（每次會借啲玩具番屋企玩），但個形式都差唔多。咁啱肚B個導師屋企有事要停，而佢覺得肚B上社交小組就足夠，因為我已掌握點同肚B訓練，響屋企做唔洗去上堂。
排CAC評估要等好耐（肚B就等左9個月先見醫生），但搵協康會依啲機構評估好貴之餘都係要等。所以，我想同分享個訓練內容，雖然我唔係專業而且以下都係我個人理解，但我好希望畀有需要嘅家長參考，響等候評估或者訓練期間，可以響屋企同小朋友一齊玩、一齊學習。
一、自我介紹
- 導師話3歲應該識講自己叫咩名、年紀、住邊度、響邊度讀書同讀幾年級。另外都會分到自己係男仔定女仔，記得屋企有咩人同埋叫咩名。
- 除左一問一答，導師都會叫肚B自我介紹，等肚B練習講成句唔係淨係講答案。雖然導師有響側邊提水，但肚B都講到食晒鑼絲。
二、認知：用圖卡或者玩具去教物件名稱、顏色、形狀、大小、空間概念同埋分類等等
肚B對具體嘅物件認知都OK，所以導師主要教佢去講，例如：
- 用圖卡教肚B去敍述，慢慢豐富同加長句子，如「打韆鞦」，邊個打？「姐姐打韆鞦」，響邊度？「姐姐響公園打韆鞦」。
- 用啲玩具排隊，叫小朋友數數目，教第一...最尾。
- 配對圖卡搵關連物件，好似去游水要著泳衣，或者物件嘅用途，如電飯煲要黎煮飯。
- 睇唔同顏色嘅物件圖卡，之後問番肚B，例如：有咩紅色嘅生果。
三、語言及理解訓練：透過遊戲去訓練小朋友講野，過程中去糾正肚B嘅問題
- 肚B講物件唔識用連接詞，教佢講「蘋果"同埋"橙」，另外肚B講有咩物件時就算相同嘅野都會講出黎，要糾正番（例如：有2個蘋果1個橙，佢會講，問佢有咩生果會答「蘋果、蘋果、橙」）。
- 用啲動物同生果玩具，叫肚B「拎香蕉畀大象食」或者「請大象食香蕉」，講果時要有變化等肚B可以學識唔同表達方法。另一方面，都要肚B一邊講一邊做。
- 過程中同時訓練聽指令，由1個開始慢慢加上去同豐富個指令，例如：「拎A同埋B畀我」（2個指令）、「拎A、B同埋C畀媽咪」（3個指令）、「放大果個A響紅色個盒裡面」（豐富個內容）。
小進步：之前肚B只聽到2個指令，宜家可以聽到3個指令。另外，佢講野肚B係明顯進步左，句子都多左變化同長左。
四、小肌訓練
- 主要玩穿珠仔、夾衣夾果啲。
- 依個餵狗仔玩具肚B最鐘意玩，導師教要用三隻手指去拎個鉗，唔可以「BB手」咁用拳頭去捉實。
小進步：其實響學校都學識扣鈕同正確揸筆手勢，不過經導師提醒，我地畀肚B用番學習筷子一排，發現佢揸一啲夾型嘅筷子個手勢都啱番，不過就未識揸普通筷子。
五、感官訓練：訓練埋專注力
- 先畀小朋友睇同摸不同物件，然後放入袋要憑觸覺搵番出黎，有啲物件要似去增加難度（例如：有筆同埋牙刷都係一支支，但牙刷有個刷毛可以分辨到）。
- 唔同樂器兩套，一套放枱面，另一套收埋響枱底，要小朋友聽係邊種樂器，搖番相同樂器。
- 將物件放響三個反轉嘅杯裡再轉啲杯，再叫肚B估邊個杯有野，訓練觀察力。
- 拎個鼓叫肚B一邊講物件名稱一邊拍，例如：講「蘋果」就「蘋」（拍一下）「果」（拍一下），依個唔知訓練乜野，不過肚B係經常會拍多幾下。
六、輪流玩
我唸「輪流玩」主要係訓練社交同埋要學識等候，而玩嘅過程都可以訓練講野。
依個係上堂嘅遊戲，要擲骰仔去放「顏色」或者「形狀」落去張咭度，過程中會叫肚B講玩嘅次序、到邊個，仲要學識規舉（如：每人擲一次骰仔）同埋輸贏。
七、仿砌類
肚B冇訓練過真係唔識跟住做，兒科醫生話唔跟住做已經係固執行為，其實依點我唔明，小朋友冇咁聽話或者好有創意，都算固執咩？
- 唔同顏色生果，2個相隔咁叫小朋友排（如：蘋果、橙，蘋果、橙），再慢慢加上去。
- 唔同顏色積木兩套，自己砌一啲形狀，叫小朋友跟住同相同顏色積木砌一樣形狀（叫做「仿砌」）。
- 跟住圖卡去用一樣嘅物件去仿砌。
小進步：上左幾個月堂，肚B有好明顯進步，可以唔洗提就自己砌好晒，有時會攞錯但佢會一邊望清楚幅圖，一邊拎番啱。
八、其他
- 訓練眼神接觸：貼紙貼響五官，或者將啲物件放響枱嘅四角再用眼神示意拎邊樣，吸引肚B望自己。另外，都係要提佢要望人。
- 分辨你我：導師叫我地先教肚B講「我」，唔好教「你」住，因為會好混亂。肚B好多時候會講自己名唔講代名詞，依個時候可以拍拍佢心口教佢講「我」。
小進步：其實肚B對熟悉嘅人或者佢主動撩人時會望人，但唔熟嘅人或者被要求做一啲野時就唔太望人，依點分別唔大。不過講「你」、「我」就好似有少少改善。
*************************************************
訓練內容大概係咁，希望可以畀大家參考，響屋企多加訓練。
其實我都有脆弱嘅時候，有次仲因為依個仿砌遊戲鬧到肚B爆喊繼續唔到（佢一開始淨係識放響圖咭上面，但係要好似幅相咁，放響下面）。果次之後我都反省過，玩遊戲係想肚B愉快中學習，就算佢唔識，只要畀時間同耐性佢都會做到呢！所以響佢學習嘅同時，其實我都有所成長。
最後想同大家分享依篇文章，我睇到覺得好感觸、好感動！我曾經都因為肚B某方面比人慢而著急，但就忽視左佢比人優勝嘅地方。其實，肚B一直按住佢自己嘅步伐進步緊，我可以做嘅就係支持同鼓勵佢呀！
來源：網絡文章（朋友send畀我）
