其實當初寫Blog純粹為左紀錄陀肚B嘅心情同經歷，慢慢識左一班媽媽Blogger變左大家交流湊仔女經，同埋基於師奶仔心態間中可以有產品試用同試玩（嘻... ^^"）。
不過，我只係一個平凡人，唔需要出名、唔需要暴光率高企，更加唔想肚B同細妹啲相畀人利用，所以一直搵方法點樣可以保護到Blog嘅相，尤其唔好響搜尋引擎用圖片搜尋就搵晒啲相。
前排終於搵到方法，所以想同大家分享。
首先當然係加水印，雖然會麻煩啲，但人地要偷相都變得麻煩啲。我加水印位置會視乎相片內容而決定，如果張相有小朋友正面我會加響頭個位置，因為如果只放響右下角，其實好容易就可以裁走個水印。
其次就響搜尋引擎方面著手，因為只要響搜尋引擎個「圖片」輸入keyword就可以搵到好多相關相片（當時我試過search「食藥」搵到肚B張喊住食藥相）。Blogger啲相係放響Google Picasa相簿，正常要有link嘅人先睇到，但因為啲相放響Blog甚至其他網站上，搜尋引擎就可以從網站內容搵到張相。
Google搜尋引擎：圖片搜尋
其實只要響「Blogger > 範本」揀「編輯HTML」，再加下面依段code響<head>下面就解決到問題，佢個意思係唔洗將網頁上嘅相加入搜尋引擎（不過好似對Google先有效，我唔肯定，因為Yahoo搵唔到我個Blog ^^"）。
<meta content='noimageindex' name='robots'/>
參考：Google文章《漫遊器中繼標記和 X-Robots-Tag HTTP 標頭規範》及《使用漫遊器封鎖 Google 新聞》
Blogger > 範本
我自己試左一段時間先出post，證實左新post仍然可以響Google搜尋引擎度搵到，但響圖片搜尋就搵唔到幅相。當然，咁樣會令暴光率都低左，但係我覺得唔緊要，因為正常人要搵資料都響搜尋引擎搵網頁內容，除非刻意要搵相先用「圖片」去搵。不過要注意，如果張Blog內容copy去其他網頁，都一樣會搵到啲相架！
至於已經響搜尋引擎嘅舊相可以點處理？睇Google內容話大約90日會自動更新，我冇等90日所以唔肯定，但如果一啲肉酸相我就會收起個post再響Google Webmaster度「移除過舊的內容」。
移除過舊的內容
移除過舊的內容
大概一日就會刪除左，響Google搜尋引擎同埋圖片搜尋都搵唔到
為左方便Blog媽們，提供多一個方法畀大家，可以響以下兩個link「sitemap=」後面輸入自己Blog個連結，都一樣可以通知到Google同埋Bing架！
http://www.bing.com/ping?sitemap=
https://www.google.com/ping?sitemap=
如果想限制Google同埋Bing搵到Blog嘅指定內容，可以去「Blogger > 設定 > 搜尋偏好設定」個「自訂robots.txt」度設定。依度我唔詳細講，因為我唸Blog媽們未必有興趣 XD
Blogger > 設定 > 搜尋偏好設定
另外，點樣保護文章內容防止被人複製？其實只要響「Blogger > 版面配置」新增「HTML/JavaScript」，再參考依個網站內容《置入簡易型防止文章被複製的語法（Blogger可套用）》輸入果幾行code，咁人地就唔可以選取文字同right click。不過如果有心偷文都仍然偷到，而且咁樣都會令大家都唔方便，所以我暫時冇咁做。
