自細妹改食兩餐粥仔之後，我仲keep住一日泵3次（泵奶schedule：06:30、14:30、22:00），每次泵夠30分鐘就停，一日大概有30-32安奶。由於細妹食3餐奶但每餐得6安，而我每朝畀肚B飲1餐8安奶，所以每日都有奶淨。
肚B果時我係等佢足1歲先改泵2次（回顧「全泵媽：一日泵2次」），因為果時睇討論區啲人成日話全泵會越泵越少，唔敢咁早減泵。但以我上胎經驗，全泵媽餵到14個月奶量都足夠肚B食，只係黎經期果幾日泵奶要引多啲奶陣先夠數，所以今胎我決定提早減泵。
睇番舊post，由一日泵3次改泵2次，係捱唔到12個鐘泵1次奶，所以我襯農曆新年假期果幾日開始減泵，因為啲時間易啲安排呢！
頭一日減泵，日頭我捱到11個鐘就忍唔住要泵奶，夜晚因為瞓著會容易啲捱過，半夜痛醒都可以再瞓番，不過都係忍到11個半鐘天未光要起身泵奶。過左頭兩日適應期，到第三日開始12個鐘先泵一次已經唔會谷到太痛，但如果到11個鐘打側瞓都會有滲奶情況。
- 減泵第1日：11個鐘泵一次（每次30分鐘）有25安，因日頭先開始減泵，所以第一次泵仍然係一日泵3次個份量
- 減泵第2-6日：11-13個鐘泵一次（每次30分鐘），每日約27安，奶量暫時穩定左
其實提早改一日泵2次（泵奶schedule：06:30、18:30），除左因為細妹食固體進度好令我有奶淨，另一個原因係我想平衡番自己生活。要限時限刻泵奶，其實要好多野去配合。好似有時想同肚B出街，朝早出去又要趕住2點幾返屋企泵奶，或者要提早2點泵奶先可以同肚B出街；有時放半日假同老公拍拖睇戲，又要揀個時間可以畀我泵埋奶先睇戲。不過我唔覺得麻煩，因為凡事都要取捨，響依段時間，係我選擇要帶畀肚B同細妹依份保護。
改泵2次之後，放假我可以幫兩姐妹沖涼、陪瞓覺，餵食粥仔、餵飲奶，時間易安排左好多，可以多啲陪番細妹。另外因為每朝早起身泵奶搞到個人好攰，有時夜晚陪完肚B自己都去瞓覺，少左時間同老公兩個人傾下偈...宜家精神左，有時可以同老公去拍下拖，兩個女瞓左又可以一齊傾下偈先瞓覺，其實自己都開心左架！
我終極目標係可以12-15個鐘泵一次，咁樣要出街都方便啲，而且暑假想帶埋肚B去日本旅行（我地已經4年幾冇去旅行啦！），到時可以早晚泵奶，出去玩都痛快啲呢～
響度又要再一次多謝人奶爸，冇佢嘅支持，我好難可以堅持到今日呢！
