4歲返健康院驗眼

之前見幾位Blog友同埋有一位朋友講，佢地小朋友分別有散光、弱視、眼睫毛倒生、斜視等問題。雖然平時見肚B睇野好似冇乜問題，離遠有啲字或者公仔佢都會講到出黎，但平時屋企成日開電視（不過我地冇畀肚B玩手機架），搞到我都好擔心，所以等到肚B足4歲就即刻打電話返健康院約時間驗眼。

因為肚B返學返全日，我就揀左今日4點半去驗眼，去到健康院等左一陣就入房見視光師。

入到房，視光師叫肚B坐好就開始檢查：

1. 雙眼一齊睇英文字母，每組有4個英文字母（分別有O、V、Y、U、X、H），由大睇到細，肚B一路都講得出啲字母。
2. 戴眼鏡遮左眼淨係用右眼望，都一樣睇到啲英文字母。
3. 戴眼鏡遮右眼，讀到第2細果排字母開始要估，最細果排字母直情話睇唔到（心知不妙）。
4. 熄燈用個儀器檢查眼鏡。
5. 開番燈去望遠處物件，但不停用手響肚B眼前左右Fing，問肚B物件嘅細節。
6. 拎左支公仔筆出黎，放左又放右邊（我唸係check有冇斜視），再放到好近肚B眼睛問隻公仔個細節。
7. 最後再反覆戴唔同眼鏡遮其中一隻眼去睇英文字母。

結果，視光師話肚B有150度遠視，不過係正常，BB一出世直頭有300度遠視，慢慢大就會少番，但係當冇遠視就會開始有近視。另外，右眼有50度散光，左眼就有100度散光，不過因為肚B右眼可以睇到最細果排字（大人標準），而左眼睇到同估到第2細果排字（4歲半標準），所以佢畀肚B合格。

視光師話50度散光唔會當有問題，所以主要留意左眼果100度散光，不過冇野可以做到，暫時亦都唔戴眼鏡住。如果我擔心，可以約半年之後再返健康院檢查，但話通常半年見唔到大變化；如果我半年後唔返，就到小一先再檢查。雖然視光師話小一個標準，啲字仲大隻過4歲個標準，但佢話好多小學生都唔合格 @@

見完視光師，姑娘就幫肚B度高磅重，重14.85kg（約50生長線），但除鞋度高原來得98cm高（約25生長線 >_<）。另外姑娘問番發展情況，因為之前都轉介左去CAC評估同有服務，所以佢地就唔會跟進。

臨瞓我同肚B講佢左眼睇野會有啲矇查查，問佢想唔想戴眼鏡，佢好開心咁話想（梗係啦，之前貪得意買依啲眼鏡畀佢，佢覺得好靚）。好彩肚B用雙眼去睇野暫視唔大問題，宜家唯一可以做就係提佢要點保護眼睛啦...