上個星期肚B響學校見言語治療師做左評估，結果係佢理解同表達能力分別遲左3個月同埋5個月...
語言理解發展：遲緩（4歲1個月）
語言表達發展：遲緩（3歲11個月）
今次評估方法係用雷妮氏語言發展量表（香港版本），我睇番舊post原來肚B三歲返CAC見言語治療師做評估（回顧）都係用依個方法，當時肚B響理解同表達能力分別遲左3個月同埋6個月。睇番舊post有啲感觸，因為見證到肚B依一年好大嘅進步，除左講野之外，其他各方面都改善左。
雖然肚B理解同表能力改善左，但始終比同齡弱，而且有時會畀人「9唔撘8」嘅感覺。幼稚園小朋友就話仲好純真啫，上到小學仲係咁嘅話，我真係擔心佢會畀人笑同埋蝦...我唯一可以做，就係從生活中去幫佢同埋埋糾正佢，希望佢可以改善到。
肚B宜家K2，出年就到我地要揀小學啦！其實我上年已經開始睇定小學資料，依區競爭好大，所以我已經篩走所有一線小學，再篩走普教中同埋太遠嘅學校，只係short list左幾間二線小學。我一黎唔想間學校太谷，二黎依區嘅二線小學揀「乙二」已經入唔到，以肚B能力要去叩門真係會輸蝕。
我真係唔想肚B要跨區返學咁辛苦，亦都唔想佢做繁忙兒童失去快樂童年，希望一切順利啦！
