生完之後因為想餵母乳所以顛喪左一排，今日終於有時間用下電腦啦。總結依幾日法國之旅：好難忘，同埋好多大陸人！
第一日
第一日中午去法國醫院登記入院，原來要上3樓產科登記後落番地下畀番住院deposit。之前聽朋友講剪臍帶要額外收費，原來丈夫陪產都要，不過依個歷史時刻梗係要老公一齊見證啦。之前最擔心嘅係要同大陸孕婦同房，問番姑娘佢話有一間8人房係淨係畀香港人住，其他房佢地都會盡量分開香港同大陸人，最終我揀左3人房，雖然只有門口位，但同房另外2個香港媽媽都好靜，好彩！
登記完會做啲簡單檢查同埋剃毛毛，仲有排先到開刀時間，等到有啲悶反而唔覺緊張。到開刀時間前1個鐘，去多個廁所就換定手術袍，之後姑娘就推我入手術室果區啦。老公會先響另一間房standby，我等多陣都入手術室。麻醉師先幫我響右手背插喉吊鹽水，之後就側身響尾龍骨打麻醉，原來唔痛架，反而打手背仲痛啲。
打完麻醉針開始有少少腳痺，姑娘們準備手術其間掂到下半身任何位置都好似畀針吉咁，我又試下郁隻腳但開始郁唔到，個感覺都幾驚架。set好個陣姑娘就叫老公入黎手術室，之後藍醫生響我肚皮拉下扯下，麻醉師唔講都唔知原來已經落左刀，隔左陣麻醉師話要響我肚度幫手推BB出黎，冇耐就聽到BB喊聲，我果刻感動到喊左出黎！雖然老公帶定相機，但姑娘問我地影唔影8R相會有埋隻CD，結果影左6張相。見完BB一陣老公就同BB離開手術室，我就再縫埋針，整個過程應該45分鐘搞掂（由麻醉到BB出世約20分鐘），而BB出世有2.8kg（6磅3安士），身長48cm
返到病房，過多2個鐘度傷口開始怨怨地，都唔算太痛。醫生話麻醉後4個鐘可以飲水同食粥水，好彩試飲果皮水同幾啖粥都冇嘔。手術後4個鐘開始好攰，所以叫老公返去休息，自己都瞓下覺。
第二日
第二日好早就醒左，尋晚瞓得都OK，不過一晚要量血壓度體溫又要換鹽水同尿袋，所以醒左好多次。兒科醫生蔡醫生朝早黎，同BB檢查一切正常健康，尋日到今日屙左2次便便，其實只要BB健康已經好安心呢。
為左可以快啲上奶，起身開始不時就按摩胸部同嘗試擠奶，起初擠唔到，按完左邊擠到啲啲濕（生之前都試過2次，原來按摩真係work嘅）。
今日第一次試落床，之前以為好輕易，原來都真係幾痛。落左床坐一陣唔見暈就試行下，可能因為瞓得太耐對小腿冇乜力，同埋第一下企直個人都有啲痛，不過仲忍到，為左可以見到BB幾痛都忍到！
法國醫院一日得4個餵奶時間，第一次抱住BB真係好窩心！不過埋身餵時BB顧住瞓覺，塞埋入口都唔啜，嘗試用手擠每次只擠到啲啲夠濕嘴仔，點整BB都唔起身啜，結果都係要補奶粉。法國醫院用嘅奶樽配個「鴨嘴」奶嘴，未放入口已經倒晒奶咁，老公話咁樣啖啖有BB梗識揀喎。冇法子，唯有多啲按摩希望快啲上奶，本來想問醫院借奶泵原來要收錢，所以叫老公聽日拎個奶泵黎試下響餵BB後同期間泵奶刺激下身體，如果泵到先問醫院借消毒好嘅樽，因為上網睇自備的話佢地驚未消毒唔會用黎餵BB。
第三日
第三日今朝一早起身按摩胸部唸住8am果轉餵奶，點知入去餵奶房換完衫，姑娘話要等見兒科醫生再過多陣又話醫生睇緊BB要返房等，突然間冇得見BB果下忍唔住眼濕濕。
兒科醫生黎到講解BB健康情況，佢話BB甲狀腺素偏高（即：甲狀腺功能不足），正常係15而BB就15.8，可能會影響BB腦部發展，要過一星期返黎再抽血覆檢。聽完果下都未識驚，後尾上網睇原來咁樣會影響智力同發育緩慢，仲有終生食藥，忍唔住喊出黎。後尾知有個朋友前排響法國生BB都係咁樣，覆檢就冇事，本來又放心少少，但聽產後講座時廿個人裡面得BB一個驗到偏高，又好擔心。
第四日今朝見到兒科醫生再問清楚，甲狀腺素標準係細過15，所以BB 15.8係啱啱過界，佢話好多BB出世驗臍帶血都會有但覆檢就冇（後記：好彩之後再覆檢BB冇事 ^^）。尋晚聽姑娘講甲狀腺素高要終身食藥，我問醫生如果touch wood有咩係咪食藥可以控制到唔會影響發展，佢話係，咁都安心啲！
見完兒科醫生，過15分鐘可以過餵奶房幫BB搞出院，要媽媽親自去。姑娘畀番所有BB嘅資料同報告，落番地下會計部畀錢，再上番去餵奶房就可以贖番BB啦，終於要開始我顛喪嘅湊B生活啦~
今次法國之旅住左4日3夜3人房總共用左$49,000，其中產科醫生$22,000（接生費連巡房費）、麻醉師$5,500、兒科醫生$2,200，另外手術室費同物料費$8,800，反而其他床位同雜費果啲都唔算貴，比我預期平左（有位網友都係睇同一位產科醫生，住左5日4日8人房同埋BB照左2日燈，用左約$56,000）
肚B
細妹
