7週胎細

自從上次見紅之後，我足足訓床訓左幾日（上網睇係要打平訓，除左食野、沖涼同去廁所，其餘時間都係訓響度），終於等到今日去覆診。

今次照陰超，胎囊同胚胎都大左，胚胎有4mm大，但藍醫生話個size同週數唔吻合（細左一週），可能係BB冇大到，情況唔樂觀。我忍唔住流眼淚，醫生叫我一個星期後返黎覆診，如果都係咁樣就…

走果時，我已經上網search如果胎細左可以點做，通常D人話訓多啲，仲有食雞蛋、牛扒、花膠同埋飲牛奶都可以養胎。返到屋企好攰就訓左陣覺，間中都有眼濕濕。不過老公安慰我可能BB同我一樣都係慢幾啪，好似平時我地去跑步，都係行落斜路到平地先開始跑，可能BB之後會追得番。我知道宜家冇野可以做，唯有食多啲養胎食物、訓多啲，同埋正面啲，希望BB可以同我一齊努力。