第一次住院

驗到有左之後唔夠兩日，朝早6點幾就下腹痛醒左，痛得都幾辛苦，有啲擔心所以老公陪我去廣華睇急症。可能因為係剛剛有左，同埋響分流站量血壓又好低，個姑娘仲安排張輪椅畀我坐，等左10分鐘左右就有得入去見醫生添，之後醫生仲要安排入院再詳細檢查。

等左一陣終於有得見醫生，但同時有一男一女實習醫生響隔離睇，醫生幫我照陰道超聲波時我真係好唔自在，因為果兩個實習醫生都一齊望住...醫生話因為我週數細，所以未照到有任何野，又嚇我下腹痛可能會係宮外孕，要我抽血做檢查同埋留院觀察一晚。

結果當日，我下腹時痛時唔痛，但醫生冇開藥畀我，只係我自己捱時間過。原來住院都幾悶，廣華仲要係一日得兩個探病時間，其餘時間都響張床度睇電視。

到第二日醫生話驗血報告正常，畀我中午前出院。因為都擔心，所以就約左自己私家醫生再檢查，藍醫生幫我照超聲波時見到子宮裡面有一細點黑色懷疑係胎囊，話根據佢經驗我應該唔係宮外孕，我終於先放心少少。